باشلیرام سؤزومو آللاه آدیله
یوردومدان یازیرام حق امدادیله
"جولفا" ای قوجامان، سئوملی یوردوم
سنی اوبا-اوبا گزمگه دوردوم:
"اوشتیبین" یوردومون، "ماسوله" سی دی
بؤیوک نباتی نین ئؤلمز سسی دی
بزه یه ر هر زامان دکان-بازاری 
 آلماسی، هئیواسی، انجیری، ناری
اوردان اوز آشاغی گلدیگیم زامان
 منی قارشیلاییر "میسن" له "قولا...ن"
بارلی-برکتلی تورپاقلاری وار
شیرین، ترش نارلاری ذوقومو اوخشار
"کردشت" ین حامامی بو گوزل بینا 
 شؤهرت قازاندیریب اونون آدینا

"دوزال" دا انجیر له نارلا دولودور

بورادا یوردومون شؤهرت یولودور
"نوردوزو"نده ن چیخیب آشیرام داغی

گؤروره م بیر پیرین پارلیر چیراغی
گئدیرم چاتیرام امام زادایا 

 یوردومون گؤیونده بنزه ییر آیا
بورا "نوجه مهر" ین شهرتی-شانی

هامی بوردا گلر کسر قوربانی
"هلق" ین "الوان" ین بالی، کره سی

یام یاشیل گئیینر داغی- دره سیئ
"کومار" داغ دؤشونده دایانمیش ایقلیم

 تعریفین یازماغا قیسا دیر دیلیم
"ایری" نین اریک ده ن سوقاتی وار دیر

بورا دا یوردومدا آدلیم دیار دیر
"سویاری" شهری آرازی بزیر

گئنیش یوللاریندا ماشینلار گزیر
"احمد آباد" کندی "مارازا" کندی

برکت سوفره سی بوردا دؤشندی
آرازین سویوندان ایچیر باغلاری

جنة چاتارسان آشسان داغلاری
جنتین آدی دیر "دیرمان دره"

گزمه لی بیر یئردیر بوتون ائللره
اورادیر ائللرین سرین یایلاغی 

 روحا صفا وئره ر یاشیل چایلاغی
"کمچی" نین اته یی گولدور- چیچکدیر

 "اوشار" دان "داران" دان یازمام گره کدیر
بو کندله ر کمچی ده ن وقار آلیبلار 

 چیچکلی عطیرلی باهار آلیبلار
"ارسی" یورد اولوبدو صنعتگرلره

گررکه می دییشیب بنزیر شهره
"نوشیران" قالیبدیر دالدا، بوجاقدا

 چوخ سؤز یازماق اولار نوشیران حاقدا
ایگیت لر خوش بیر سس تانریدان آلمیش 

 ماهنی دالغالارین، داغلارا چالمیش
"قشلاق" ، "ماهاران" لا تانینیر ایندی 

 اورا بیر شخصین یوخ بیر میللتین دی
گؤزه ل شلاله لر سس لییر بیزی 

 لاله لر گؤز اوخشور، ساری، قیرمیزی
"سه ساران"، "لیوارجان" ،"زیوه"، "قره گؤز"

 اوزانار آچارسام اونلاردان دا سؤز
"علمدار"، "گرگر" ین علم اوجاقلاری

 آپاریر ائللری زیروه یه ساری
"شجاع"، "شاهمار" آدی دیلیمیزده دی 

 بوتون گؤزه للیک لر ائلیمیزده دی
چیخسان اوز یوخاری "سیلگرد" چؤلونده ن 

 کئچر سن "تزه کند" "طالیب گؤلو" نده ن
قالار یادیمیزدا، دره ده، داغدا

"آغ بلاغ"، "گلفرج" ،"قره بولاغدا"
ایگیتلر بسله نیر ائل قوجاغیندا 

 گئده ر اوو، اوولاسین"کلید داغیندا"
"جولفا" بزه کلنیب، پاکدیر، تمیزدیر 

 بیر آزاد تجاری منطقه میزدیر
بئله جه بیتیردیم بو گزینتینی

 سیزده خاطیرلایین شاعیر"مسکینی"