ای غنچه دهن، سیم بدن، دلبر طناز
ای سرو سر افراز!
اُولدوم داخی، قوربانین اولوم، رحم ائله بیر آز
 بسدیر بو قده ر ناز.
یاندیم، کوله دوندیم، یاناسان سن ده منیم تک،
 ای دختر ترسا،
اول ناکس ایله اولما داخی همدم و همراز،
 والله بئله اولماز.
آدم کیمی چوخداندیر اولوب ورد زبانیم،
یا ربی ظلمنا!
اما کی نه حاصیل او جفا پیشه اینانماز،
 بیر دم منه باخماز.
سن بویله بیلیردن کی اوزون عاشیق اولوبسان،
کول باشینا اولسون!
دور پوفله اوجاغی، بو اودون یاشدیر، آلیشماز،
 اوز باشینا یانماز.
مین داغی اگر بیر نفسه جانیما قویسا،
 بیر اوف دئمه رم من،
اما اونو گور بیرجه منی یانینا قویماز،
بیر بوسه یه قییماز.
قالدی داخی چون محشره بو حسرت دیدار،
 ای یار وفادار!
باری هر ایکی ایلده سوروش حالیمی آژ – ماز،
 یا بیرجه کاغیذ یاز.
طوطی کیمی فریاد ائله رم خسته و رنجور،
 بو کونج قفسده،
بیر پسته ایله کیمسه منی یادینا سالماز،
 بیر کونلومو آلماز.
ای بولبول بیچاره! فغات ائتمه دمادم،
 صبر ائیله دوت آرام،
دائیم کی قیش اولماز، مئی همیشه بئله قالماز،
 البته گلر یاز.
اوز وورما، منی سئیر گولوستانه آپارما،
 ای همدم جانی!
یوز فصل باهار اولسا، منیم کونلوم آچیلماز،
 بو کئفدن آییلماز.
یاریم یئنه مندن کوسوبن آجیق ائدیبدیر،
 اوخ! اوخ! آمان آللاه!
بیلمم نه قیلیم، چاره ندیر، بیر اوزون آچماز،
بیر کلمه دانیشماز.
کونلوم ائوینی لشکر غم ائیله دی ویران،
 ساقی سنه قوربان!
دور وئرکی بو سیسقا بیر–ایکی جامیله دویماز،
تا دوشمه سه، قانماز.
سال غولغوله، بو گنبد افلاکه، خروش ائت،
 ای دف زن چابک!
مطرب! داخی سن شـّـد ائله بیر نغمۀ شهناز،
 ای مرغ خوش آواز.
هر نه دئیه جکسن، دئه گیلن، جانیما خوشدور،
 ای زاهید بد کیش!
دریایا داش آت، یا قایا سال، ذره جه داشماز،
هرگیز کی بولاشماز.
باخما کی بئله عاجز و مسکیندی نباتی،
هی! هی! حذر اوندان!