آی عاشیق چال کرمی اصلیده ایستیر اودا یانسین
ایستییر عینی کرم تک اودا دوشسون اودا، یانسین
نجه بیر ناره دوشوب سوگیلی یانسین او، دایانسین
چال بو عاشیقلر اوتانسین

آی عاشیق چال کرمی دوره یغیلمیش جمی یاندیر
چال بو پروانه نی یاندیر شمی یاندیر
زیلی یاندیر بمی یاندیر
چال عاشیق عالمی یاندیر

آی عاشیق چال کرمی چال قیشا دونسون یاز آلیشسین
چال یازخدیر بو کرم دای اودی سونسون آز آلیشسین
اصلینین اتدیغی او عیشوه سی یانسین ناز آلیشسین
چال سینه نده ساز آلیشسین

آی عاشیق چال،آی عاشیق چال هامی بیلسین
بو صداقت،بو محبت ، بو وفا نسلیدی واللاه
هانسی عاشیق بدل اولسا بو کرم اصلید ی واللاه
گر باهاردا کوله دونسه اودا غم فصلیدی واللاه
باعیثی اصلیدی واللاه

آی عاشیق چال اوزونی اصلیده دای یوخدی کرم تک
ایلدیریم ناندا بتر ناله چکیب شاخدی کرم تک
کول اولوب آخدی کرم تک


*****************
بسدی دای چالما قادالیم
دماغا یوخدی مجالیم
قولاغ آس گور نه دی حالیم....

منده بیر اصلی صیفت دیلبره دوندوم کرم اولدوم
اصلی تک ناز الییب منده سویندیم کرم اولدوم
بیر اوره ک تک اونون عشقینده دویوندوم کرم اولدوم
من اونا سیریمی آشدیم
او کوسرکنده باریشدیم
منه اود وردی آلیشدیم گنه سوندوم کرم اولدوم

سورا بیلدیم او وفاسیز منه هچ اصلی دییرمیش
اصلینین نسلی دییرمیش
من باهاردا اونا دل وردیم عومور دوندی قیش اولدی
او باهار فصلی دییرمیش
اصلی بیر اصلی دییرمیش

بی وفالر کیمی اوز عهدینی قیردی ، سوزی گدی
او گددرکن کرمین گوندوزی یوخ گوندوزی گئدی
ایذن ور بویله دییم یاپ وزی،گدی
من آلیشدیم اوزی گئدی

*********
ایندی باشلا چال عاشیق چال کرمی هر یانی یاندیر
قات کرم دردینه بو دردیمی چال دونیانی یاندیر
سازی آل دونیانی یاندیر
چال یانان مهرانی یاندیر..........