ای ستمگر منی رسوای جهان ائیله میسن
گوزومون یاشینی چون دجله روان ائیله میسن
همنشین ائیله میسن دشمنی ای مایه ی ناز
رشگدن جانیم آلیب، باغریمی قان ائیله میسن
گون کیمی عارضووه زلف چلیپانی سالیب
گونی گور ابر سیه آلتدا نهان ائیله میسن
نازیله، عشوه ایله، سیر ائله ییب گلزاری
گوستریب معجزه سن سرو روان ائیله میسن
بیر جانیم وارایدی ای شوخ کی آلدین او زمان
اوزگه جان داهی بو بی کسده گمان ائیله میسن
قاشلارون تیغ ستم آلمیش اله، کیرپیگون اوخ
اولدوروبسن منی ناحق یئره قان ائیله میسن
نه اوچون ای شوخ نقابین گوتوروبسن اوزدن
روی خورشید وشی خلقه عیان ائیله میسن
آلمیسان عقلیمی سردن منیم ای آفت جان
قددیمی محنت هجرونده کمان ائیله میسن
هوس وصلویله ای مه من «حیران» ی
باشی یئرده، گوزی یولدا نگران ائیله میسن

(حیران خانیم)