آنام لای لای دیه نده

قارانلیق گویلرده ن آی سوزوب آخدی
اولدوزلار دالینجا حسرتله باخدی
گوزومون یاشلاری ئوزومدن آخدی
آنام نوه سینه لای لای دیه نده

قوشلار نغمه سینی سه سینی کسدی
شیرین زوم زومه لی بولاق دا سوسدی
قلبیمین ان ظریف تلله ری اسدی
آنام نوه سینه لای لای دیه نده

آللاه خیالیمدان گور نه لر گئچدی
بیر قملی خاطیره قلبیمی دئشدی
حسرت یوردلاریمیزی یادیما دوشدی
آنام نوه سینه لای لای دیه نده

بیر کورپه اوشاقا دوندوم او آخشام
بیلدیم نده ن اوتری من داریخمیشام
آناسیز لای لای سیز دویدوم بیر داشام
آنام نوه سینه لای لای دیه نده

قلب گوینه دی سیزیلدادی کمان تک
بیر قملی بایاتی چاغیردی اوره ک
دونیا لای لای دئدی ائله آنام تک
آنام نوه سینه لای لای دیه نده