شعر : ستار گلمحمدی

گؤسترمز اوزون هر یئته نه دؤولت دیدار

باغ ایچره گولون عطرین هاردان دوشونر خار

جاهیل نه بیلر عالم معناده نلر وار

دیل قانیدی، گؤز نورودو، جان قیمتی دیر شعر

عارفلر ایچون معنوی ائل ثروتی دیر شعر

××××

حیکمت کیمی داییم آچیلار سؤز دیلگیندن

هر قلبه آچار بیر یئنی یول اینجه لیگیندن

داهیلره مین فئیض وئرر اؤز بیلیگیندن

هر عصریلرین یادداشی زنگین سسی دیر شعر

اؤلمز حیاتین دیلده گزن نغمه سی دیر شعر

××××

بعضن اوجالار ائلده نیظامی شکیلینده

ظولمتلره میدان اوخویار مشعل الینده

بعضن دیل آچار دونیادا خاقانی دیلینده

حقسیزلیک اولان اؤلکه ده یاس دیر، آغی دیر شعر

ظولمون قاباقیندا دایانان قاف  داغی دیر شعر

××××

بعضن اؤیونر صاف سولارین زمزمه سینده

بعضن دویولار داهی فیضولی نفسینده

بعضن بوغولار عصرلرین دار قفسینده

حاققی سئون اینسانلارین  اؤتگون دیلی دیر شعر

حسرتده یانان سئوگی لرین نیسگیلی دیر شعر

××××

شیمشک کیمی حیددتلی دیر، کسگین دی قیلیشدان

مئیداندا کئچر الده غضب سونگوسو داشدان

غفلتده یاتان میللتی جارلار هر اوباشدان

کئچمیشلرین اوسطوره سی، هئیکلی دیر شعر

هر عصریده حاققین اوزانان مرد الی دیر شعر

تصویر مطلب : از آقای صابر سلیمی علمداری