سؤیله گؤروم، اولوم دیلین قربانی،
نه دن وفا ائیله مدین اقراره؟!
واخت ایکن عاشیقه ائتمه دین خبر،
بلکه ائیله ییدی درده بیر چاره.
عزیزیم، درده چاره،
دورموشام درده چاره،
دیل بیلن طبیب گرک،
ایله یه درده چاره.
چاره سیز خسته لره
بولونور درده چاره.

قورخورام اغیاره اولاسان همدم،
قدرینی بیلمه یه دیلبیلمز آدم،
عاشیق گرک لحظه-لحظه، دمادم،
جان قربان ائیله یه سن تک نگاره.
عزیزیم، نگاره باخ،
نقشه باخ، نگاره باخ.
قانیمی گوللر آلیر،
ائتدیگی نگاره باخ.
حسرت قالان گؤزلریم،
دویونجا نگاره باخ!

سن ترک ائیله یه لی عهد و ایلقاری،
قالماییب کؤنلومون صبر و قراری.

سنین کیمی آلاگؤزلو نگاری،
تانری نصیب ائیله مه سین اغیاره.
عزیزیم اغیاریلن،
بایقولار اغیاریلن،
گؤروم باشا گئتمه سین،
سنینکی اغیاریلن،
نئجه گؤرسون گؤزلریم
گزه سن اغیاریلن؟

نئجه روا گؤردون، ای ملک زاده،
دؤندون آشنادان، دیل وئردین یاده.
درده تابیم یوخدور بوندان زیاده،
باش گؤتوروب گئدیم هانسی دیاره؟
عزیزیم بو دیاره،
یول دوشدو بو دیاره،
گلسه لقمان ساغالماز،
سینمدکی بو یاره.
یئته سن مزاریمه،
دئیه سن بودو یاره!

وصفینده چوخلارین آچیلیب دیلی،
عندلیب لر سئورسن قیزیلگولی،
نه دن ترک ائدرسن شیدا بولبولی؟
قیزیل گول تک همدم اولورسان خاره.
عزیزیم خاره باغلار،
آتلاسی خارا باغلار،
مگر بولبول اؤلوبدور،
گول میلین خاره باغلار؟
من اؤللم، یار آغلاسین،
اؤزگه لر خاراب آغلار.