اؤلدور منی ای غم ، سنــــی الله نازا قؤیمــــــــا

پائیزلامیشـــــــام بیـــرده قراری یازا قؤیمــــــــا

اَلده ئورگیــــم زخمـــــی گؤئَرچین کـیمـــی تیترَر

تیمــــــاریمی بیر دردیـــــلی کفتر باز ا قؤیمــــــا

نفتی قوتـــاریب زندگیــــمین ، سؤنمَه لی یم من

یاندیر قوتـــاریم پیلــته می بوندان آزا قؤیمــــــا

ظلــمت گئجه لر چوخ آیــــــــا یالواردیم ئورکدن

آی آی ، ســنی تاری گونومی گل نازا قؤیمــــــا

چوخ غملـی چالیرســــان منی سن خســته مغنّی

کونلوم اودونـی زخــــمه اَلی لن ســـازا قویمــــــا

من ؛ اردبیلــین شاخـتا کــــــسن سَرویَم اِی غَم

کارون گؤزومی اَلدَن آلوب اَهوازا قؤیمـــــــــا

تبریزده ایاقـیم ایلــیشیب ؛ یوخ یولا شؤقـــــــیم

سن دوت فالیمی ؛ قؤیما گئدَم شیرازا ؛ قؤیمــا

تندیر کیمـــی یاندیم اؤد ایـچینده ؛ کؤزه دوندوم

گل یاپ چورگون ؛ ایستیمی یاد خبّازا قؤیمــــــا

ایندی گؤروسن جان وئریرم تک لیــــگ الــیندن

مَنلَن دانیشورسان ؛ سؤزووی ایجازا قؤیمــــــا

قانماز !! اَجَل عشقین سوزونی ؛ شرح وئرم من

اولدور منی ای غم ؛ ایشینـی قانمــازا قؤیمــــــا

حسین قلیزاده خلخال