ساقیا! بیر بو ده‌گیل نشئه‌سی پیمانه میزین
هله بوندان سورادیر لذّتی میخانه میزین

بیز گرک باده‌ی گل‌گونی حکیمانه ایچک

پوزمایاق رؤنقینی مجلیسِ مستانه میزین

آیاغین اؤپمه‌لییک خادمِ میخانه‌لرین

بلکه، جام ایچره گؤره‌ک عکسینی جانانه میزین

زولف شؤقیله اولاق مست، بوتون عاقیل‌لر

قالسین ادراکینه حئیران دلِ دیوانه میزین

بیز همان رندِ خراباتیِ بی‌باک‌لریک

صحبتی ایندی‌ده دیل‌لرده‌دیر افسانه میزین

درد الیندن بوقدر چکدیگیمز ناله‌لره

نه گلیر یاریمیزن رحمی، نه بیگانه میزین

عشق زنجیرینه واحدده گرفتار اولدو

آزدی گویا، بیری‌ده آرتدی بو دیوانه میزین

شاعیر: علی آقا واحد