داغلارین باشینا دوشن قاردیمی

دوماندان خبرسیز چندن خبرسیز

کوکسومو گوینه دن اینتیظاردیمی

قلبیمدن خبرسیز مندن خبرسیز

قیردیم اوز عهدیمی من بیله بیله

حاققین وار یانیمدان کئش گوله گوله

ارییم اودونا گوی گیله گیله

من سنی سئومیشم سندن خبرسیز

آی محمد قیسمتین نلر نلرمیش

اوزاغ سایدیغیندا یاخین گلرمیش

سن دئمه داغلارا قار النرمیش

دوماندان خبرسیز چندن خبرسیز

من سنی سئومیشم سندن خبرسیز

آغارتدیم ساچلاری سندن خبرسیز

کؤچوب بیر داهالیق گئتدین یانیمدان
بوتون دویغولاری آلدین جانیمدان
ایتیب گؤرونمه ین ناکام آنیمدان
اؤتوشمه دی بیر آن غم سیز کدر سیز
آغارتدیم ساچلاری سندن خبر سیز

بیر سئوگی نیسگیلی قالیب دی منده
یاشادیغیم ایللر ایتیب دی چن ده
کاشکی بو حالیمی گؤرئیدین سن ده
اؤتوشمه دی بیر آن غم سیز کدر سیز
آغارتدیم ساچلاری سندن خبر سیز

سندن سونرا ظولوم ظولوم آغلادیم
نئچه کؤنول قیریب اورک داغلادیم
نه کیمسه نی سئویب نه بئل باغلادیم
اؤتوشمه دی بیر آن غم سیز کدر سیز
آغارتدیم ساچلاری سندن خبر سیز

نئچه واخت دیر سندن داها خبر یوخ
بوندان بویوک منه درد یوخ کدر یوخ
آنجاق کی بو گونلر داریخیرام چوخ
اؤتوشمه دی بیر آن غم سیز کدر سیز
آغارتدیم ساچلاری سندن خبر سیز
* بابک قوجا زاده