ای گؤز ، بو گلن دلبر طنازه نظر قیل ،

بو جان آلیجی شاهد شهبازه نظر قیل ،

دلبرلر آراسیندا بو ممتازه نظر قیل ،

ایمان آپاران چشم چپ اندازه نظر قیل ،

ییخدی ائویمی شوخ سرافرازه نظر قیل .

 ×××××

ای حوری جنت ، قامو انسان سنه پیشکش،

گؤستر اوزونو ، تا اولا ایران سنه پیشکش،

ائتسین سرینی عاشق نالان سنه پیشکش،

ای جانلار آلان ، بو دل و هم جان سنه پیشکش،

قربانین اولوم ، بیرحه پای اندازه ، نظر قیل .

 ×××××

بوینونو اگر سرو خرامان سنی گؤرجک،

جان تازه لنیر دیده ی گریان سنی گؤرجک،

ترسا بچه لر گتدیلر ایمان سنی گؤرجک،

شب ماه، سحر مهردرخشان سنی گؤرجک،

هر ایکیسی ده گلدیله پیشوازه ، نظر قیل .

 ×××××

آیا بو نه قاشدیر ، بو نه گؤزدور، نه علامت ،

واه واه ، بو نه قددیر، بو نه قامت ، نه قیامت ،

یاغی ، بو نه عشوه ، نه کرشمه ، نه ظرافت ،

آلدین جانیمی چم – خمیلن، قالمادی طاقت ،

بیر ائیله دیگین عشوه ایله نازه ، نظر قیل.

 ×××××

گؤرجک بویونو جلوه ده ، ای سرو گول اندام،

جانیمدا منیم قالمادی نه صبر ، نه آرام ،

ائتین من بیچاره نی نا حق یئره بدنام ،

دوران منه گر ائیله مسه ، سن پرینی رام،

ساللام گئده رم آخری شیرازه نظر قیل .

 ×××××

باخ " عندلیبین " ناله ی افغانینا بیر دم ،

رحم ائیله گیلن دیده ی گریانینا بیر دم ،

سیر ائیله ، گؤزوم، دفتر و دیوانینا بیر دم،

خوش قافیه و صحبت و هم سازه نظر قیل.