باشینا دؤندوگوم، بو نئجه حالدیر،

دینمه میش دئییرسن: آی ندیر، ندیر؟

باشیم چیخماز منیم سنین دیلیندن،

بویور گینن گؤروم آی ندیر، ندیر؟

قوربان اولوم اوزوندکی هیلاله،

غمزه اوخون میندیر گینن هئی یایه،

نه باخیرسان مارال کیمی هئی آیه؟

جمالین یانیندا آی ندیر، ندیر؟

گؤزوم قان کاساسی، اورییم شیشه،

منی کاباب کیمی چکمیسن شیشه،

رقیبی گؤروم کی، دام کیمی شیشه!

ایللر ایللر چکه، آی ندیر، ندیر

نه باخیرسان او سلطانه، بو خانه؟

چوخ آداملر گلدی گئتدی بو خانه

گئنه بو گون ایشیقلانیب بو خانه،

بیلمیرم گؤرونن آینه دیر ندیر؟

حمد اولسون آللاها، گئتدی آ چیلله!

نباتی، آز قالدی گوللر آچیله،

بو مشکولوم، یارب، کیمدن آچیله؟

یار دستینده توتان آینه دیر ندیر؟