بو خاطره نی کی ایندی سیزلره تعریف ایلییرم منیم اوشاقلوخ زمانلارونان خاطریمده قالیبدی :

میداتدا اولان کیشیلرین چوخی ، قاش قره لدیقجا ، میدانون گون چیخان طرفینده  کی بیر اوجا یره ییغیشیب ، اوردان دقتینن گون باتان یره باخیردیلار ، چوخی اَللرینی قاشلارونون اوستونه قؤیوب و سایبان دوزلدمیشدیلر کی گون گؤزلرینی اذیت ایله مه سین  ،]هله آیی گؤرماخ چتینیدی چون گون  گوزلری قوماشدوروردی ، اما آز قالموشدی کی داغون دالوندا گیزلَنسین .هله آیی گؤرماغا چوخ تئزیدی ، بیرده یاخشی کی گون باتان یرده بولوط یؤخودی دووم دوروئیدی ، آینا کیمین صاف بیر هاوائیدی . بالاجا اوشاقلار و جوانلار کندین میدانونون بیر گوشه سینده مشغولودولار اویناماغا ، هیچ بیر زاد بیز اوشقلاری اؤیناماخ کیمین سئویندیرمیردی ،گاهدان اؤقدر باشوموزقیزیشیردی کی ، چتین وضعیتده اوزوموزی ائوه یتیریردیخ ، گاهدان دا  ایش ایشدن گئچیردی ، اویناماقی اؤتورموردوخ و ....و بونا گؤره کتک یماقی گؤزوموزه آلوردوخ ....

گون داغون دالوندا گؤزلردن ایتمیشدی ، یاواش یاواش هاوا قارانلوخلاشوردی ،آیی گؤرماغا گؤره ، گون باتان یئره باخانلارون سایی چوخالوردی هامی ایستییردی کی آیی گؤرسون و ثواب آپارسون ، ولی ، علیمحمد و فرج دایی دا، اللرین قاشلارونون اوستونه قویوب دؤرد گؤزده بؤرج ایله ییب ،آیی گؤرماقا تَلَسیردیلر (من اوکیشیلره احترام اوچون دایی دییردیم ) ،بیردن ولی دایی اوجا سَسینن دِدی " من گؤردوم ، من گؤردوم "

ها ، گؤردوم ، اَدوربا ! بارماقونان گونباتان یری گورسدیردی .. گؤرنِجه ده گؤزل و بؤیوکدی ، ایله بیر ایکی  گوننوخ آیدی ، هامی  ولی دایی گؤرسه دهن یئره باخیردی ، بعضیلرینین اَلینده آینادا وارودی ، بیر آزدا هاوا قارانلوخلاشموشدی ، اوچ قارداشدان سورا تک توک آداملار دئیردیلر آیی گؤردولر ، بویولدا هر ایله تای آیی گؤرماغون ثواب ولی دایی  و اُبیری قارداشلارونا قسمت اُلدی  . ایفطاردان سورا کندین مالاسونا ولیگیلین آیی گؤرمه سینی دِدیلر ...

مالا قبول ایله مه دی دِدی : بو شوخلوخ دئیر کی ، من ولینین سؤزونن جماعته دییَِنمَرَم صاباح اوروج بایرامودی ، گرک صبر ایلییاخ تبریزدن خبر گلسین .

ولی دئدی : مَنه صاباح بایرامدی ، من اؤز گؤزومونن گؤرموشم . سیزده اؤزوز بولرسیز ....

ناهارا یوخون تبریزدن خبر گلدی آیی گؤروبلر و بویون بایرامدی .....ایندیده من بیر شِیی باشا دوشمه میشم بو چماعت نییه بو قارداشلار کورخا دئیلر ، اولارکی هامودا قشنگ گؤرولر ....