عشقون بولاغین قویما بولانسین کی درولماز
عشقئن یولونی دوز گیده هر کیمسه یورولماز
هر کیمسه گلوب عاشق لایق اولا بولمز
... بو مکتب عشق ایچره یالان اولمیوب اولماز
گر آغلاماسا قاره بولوط غنچا گول آچماز
گر گولمسه گول درد و غمه چاره تاپولماز
گلشنده گولون قیمتی گولدور گوله بولسه
نامرد الی سیندیرماسا بو شاخه نی سولماز
بیر عومر چکوب نازینی بولبول آچا بیر گون
درد اهلی اولان غنچه لنن شاخه نی یولماز
عشق اولماسا عالمده گوزلیک گوزه گلمز
بو چارداغی قویما یخا یئل بیرده قورولماز
دیوانه لیگین لذتی حیران ائدر عشقی
عومرون بویی سرمایه دی بش گونده قوتولماز
باشدان گئچر عاشق ولی یاردان گئچه بولمز
آیری طرفه هر نه اولا یولدا بورولماز