بلای عشقه دوشدون، ای بت مهپاره، صبرائیله،
گونون اولدیسه گر هجران الیندن قاره، صبرائیله،
امید وصل جنّت ایله ییب یان ناره، صبرائیله،
دوشوب مجنون کیمی صحرانی گز آواره، صبرائیله،

جفای دور گردون دونو کجرفتاره، صبرائیله.

بو آهوگؤزلولر باغلار کمند زلف ایله شیری،
تؤکوبدور چوخ لارین قانین بو یولدا عشق شمشیری،
ایتیرمه کسرت غمدن، عزیزیم، راه تدبیری،
محبت پاک اولورسا، چوخ اولور البته تأثیری،

ائدر آهین اثر اول دلبر خونخواره، صبرائیله.

اوخوردوم مکتب عشاقده تصنیف لقمانی –
کی، گؤردوم ثبت اولوب هر مشکله بیر نوع سامانی،
بو قدری چکمه هجر یار الیندن آه و افغانی،
او هانسی درددیر کیم، اولماسین عالمده درمانی،

یازیلمیش دهرده هر درد اوچون بیر چاره، صبرائیله.

وران منصورلوق لافین غم داریندان اینجینمز،
اؤزون پروانه تک شمعه وران ناریندان اینجینمز.
او شیرین لعلین، عاشیق، تلخ گفتاریندان اینجینمز.
گولوستان جاهاندا گول سئون، خاریندان اینجینمز،

اگر یار ایستییرسن، طعنۀ اغیاره صبرائیله.

نه غم، اولسا سنه، ای دوست، دشمن جملۀ عالم –
کی، ملک حسن ایچینده، تاجیداریم، شاه سن سن هم،
چکیب مژگان سپاهی ایله یکسر عالمی برهم،
و لاکین زخم تیر یاره هرگز ایستمه مرهم،

یئته گر سینن اوزره یاره اوستن یاره، صبرائیله.

اگرچی خورد و خوابی عشق عشاقه حرام ائیلر،
خیال زلفو رخساری گونون محنتله شام ائیلر،
نه افلاتون بو دردین چاره سین، نه جم، نه جام ائیلر،
اولور کی، وصل دلبر بیر گون، ای مه، التیام ائلیر،

اگر سیّد کیمی کؤنلون اولا صدپاره، صبرائیله.