شیرین سولو بیر بولاغین

قیراغیندا

ایکی سئوگی ، ایکی حسرت

خلوت ائدیب

سئودالارین دانیشیللار

شنلیک ائدیب گولوشلرین

بولوشوللر...

توت آغاجی باشلارینا کؤلگه سالیب...

اؤتوب هیجران آجیلیغی

وصله چاتیب دانیشیللار

عشق اودونا آلیشیللار...

یام یاشیلدیر داغ دره لر

چیچک آچیبدی باغچالار

شن حیاتین یاز چاغیندا

طبیعتین باهاریندا

گؤزللیکده ن کام آلیللار...

اؤ بولاغین قانشرینده

ایکی قوجا،

بیری آنا ، بیری آتا

قوجا چینار کؤلگه سینده

گؤز تیکیبلر اؤ صحنه یه!!

باهار گئچیب ، پاییز اؤتوب

قیشا دؤنوب عومورلری

آجی گونلر آغریلاری

اوزلرینده جیغیر سالیب

ساچ آغاریب

قاشلارینا قیروو قؤنوب

...         ...

حسرت حسرت - باخا باخا

خیاللارا دالا - دالا

قاییدیللار گئچنلره

قوجا دؤنوب قاریسینا سووال وئریر

یادیندامی؟ سیزه ائلچی گلن گونو؟

بیر جیل اکدیک بولاغ اوسته؟

اکدیگیمیز اؤ جیل ایندی

کؤلگه سالیر سئوگی لره!

بیزدن قالان سئوگی شویو

اؤجاق اؤلوب سئوگی لره...

             شیمشک شهبازی

۱۳۸۳/۸/۱۸