بیر غم ده اوره ک داغلامیشی ، لاله ده من ده

بیرغنچه ده قان آغلامیشیق ، ژاله ده من ده

گوم گوی گوگریب زانباقین آرخ اوسته جمالی
...
زانباق دا یانیر عشق اودونا ، لاله ده من ده

ساپ ساری سارالمیش اوزوم آلاله مثالی

بیر دلبره مفتون اولوب  ،  آلاله ده من ده

قیپ قیرمزی گول تک قیزاریر اوزده یاناق لار

حسرت له باخیر گول اوزه ، محتاله ده من ده

گلشن ده چمن یام یاشیل افغانیده بولبول

بولبول ده گلیب تنگه داخی  ، ناله ده من ده

آغ آپپاق آی اوسته توکولوب قاپ قارا زولفون

حیرت له باخیر آی اوزوده  ، هاله ده من ده

من "یوسف" عشقم یانیرام عشقین اودوندا

نورس ده یانیر عشق ده  ، صد ساله ده من ده

شعر : دکتر یوسف معماری