( اوستاد بو گوزل شعرینى اؤز یاشاییش یولداشینا دئییب دیر ) 
یارین بویون قوجاقلادیم ، یار آغلادى من آغلادیم 
ییغیشدى قونشولار بوتون ، جار آغلادى من آغلادیم 
باشیندا قار قالان داغا ، دانیشدیم آیریلیق سؤزون 
بیر آه چئکیب باشینداکى ، قار آغلادى من آغلادیم 
طاریمدا نار آغاجلارى منی گؤروب دانیشدیلار 
بویومو زیتون اوخشادى ، نار آغلادى من آغلادیم 
ائله کی اسدی بیر خزان ، تالاندى گوللریم منیم 
خبر چاتینجا بولبوله ، خار آغلادی من آغلادیم 
اوره ک سؤزون دئدیم تارا ، سیملر اولدو پارا پارا 
یاواش یاواش سیزیلدادى ، تار آغلادى من آغلادیم 
دئدیم کی حق منیمکیدى باشیمی چئکدیلر دارا 
طناب کسنده بوینومو ، دار آغلادى من آغلادیم 
«جعفرى » یم ؛ بویوم بالا ، غم سینه مده قالا قالا 
یار جانیمی آلا آلا ، یار آغلادی من آغلادیم