گزمه اغیار ایله ای گول، یانیرام، من بئله یم
جمع ایچینده سنی چوخ قیسقانیرام، من بئله یم
ایله کی ئوزگه ایلن شاد و خرامان گورورم
... اوندا دیر کی قالانیب اودلانیرام، من بئله یم
تا کی کونلوم ئوزونی ساتدی پری چهره لره
سئومیرم کونلومی ایندی دانیرام، من بئله یم
چونکی یوخدور وفاسی جمله پری چهره لرین
عشوه سین حیله کلک تک سانیرام، من بئله یم
سنده ده یوخدی گوزل مهر و وفادان بیر اثر
ظاهیری عشوه و نازین قانیرام، من بئله یم
سنه من بسله میرم اوزده ده رغبت چونکی
صورت و سیرتیمی بیر تانیرام، من بئله یم
سئوگی یوخ تانری یا قارشی گرک هر دم بئل ایم
بئل اییب، فخر ائلییب ، آدلانیرام، من بئله یم

الهامی علمداری